71 Milion euro mbështetje për strategjinë “Inovacion dhe ekselencë në IT”

Synimi i strategjisë është zhvillimi plotësisht i potencialeve të investimeve për zhvillimin ekonomik dhe nxitjen e integrimit në tregjet ndërkombëtare dhe zinxhirët e vlerës.

Mbi 71 milionë euro janë parashikuar të shpenzohen nga Qeveria shqiptare në Planin e Veprimit të Strategjisë për Zhvillimin e Biznesit dhe Investimeve 2021 – 2027, ndërkohë që rreth 80 milionë euro të tjera sigurohen përmes garancive sovrane. Dokumenti Strategjik është publikuar tashmë në fletoren zyrtare dhe parashikon mbështetjen dhe angazhimin e një tërësi institucionesh, duke filluar nga ministritë e linjës, institucionet e varësisë, njësitë e vetëqeverisjes vendore, akademia, organizatat e shoqërisë civile dhe organizatat ndërkombëtare.

Synimi i strategjisë është zhvillimi plotësisht i potencialeve të investimeve për zhvillimin ekonomik dhe nxitjen e integrimit në tregjet ndërkombëtare dhe zinxhirët e vlerës.

Synim që, sipas Ministrisë së Financave, kërkon përpjekje të gjithanshme nga të gjitha ministritë dhe institucionet që zbatojnë politika të cilat ndikojnë në mënyrë të drejtpërdrejtë në zhvillimin e biznesit dhe tërheqjen e investimeve. Një nevojë e domosdoshme dhe e vazhdueshme është gjetja e mekanizmave të duhur dhe të përshtatshëm që sigurojnë një bashkëpunim të fortë dhe efektiv ndërinstitucional si në drejtimin horizontal ashtu dhe atë vertikal.

Bashkëpunimi me akademinë, organizatat e shoqërisë civile dhe grupet e interesit, kanë gjithashtu rëndësi themelore, pasi ato mund të ndikojnë ndjeshëm në ndërgjegjësimin rreth zhvillimit të biznesit dhe investimeve, si dhe ofrimin e ekspertizës për zhvillimin e shërbimeve mbështetëse të specializuara për biznesin.

Strategjia parashikon projektimin dhe zbatimin e një skeme mbështetëse që përfshin:

1. Asistencë për NVM-të që punësojnë të sapodiplomuarit për projekte inovacioni
2. Asistencë për studentët doktorantë që janë punësuar në NVM dhe në të njëjtën kohë janë regjistruar në universitet, të cilët punojnë për një projekt të përbashkët kërkimi
3. Do të krijohen programet “Inovacion dhe ekselencë në manifakturë” dhe “Inovacion dhe ekselencë në IT” për trajnime në inovacion, dizajn, marketing, kërkim dhe zhvillim nëpërmjet mbulimit të kostove të trajnimit 100%. Kostot do të rimbursohen 50% direkt dhe 50% si 2-fish i tatimit të zbritshëm ndaj shoqërive ku është i punësuar përfituesi. Kostot e këtyre programeve do të përcaktohen gjatë përgatitjes së politikave fiskale në vijim.

Copyright: © PCWorld Albania