Kategoritë
Debuton OnePlus Nord 2 me procesor MediaTek dhe karikim 65-vat
Versioni 6GB/128GB do të shitet vetëm në Indi. Ndërsa modeli 8/128GB kushton 399 euro dhe 12/256GB prej 499 euro. Smartfoni del në shitje në Evropë nga data 28 Korrik.
OnePlus zyrtarisht prezantoi Nord 2, smartfonin më të fundit të rangut të mesëm me ekran 90Hz dhe një çip të fuqishëm ndërtuar nga MediaTek. Nord 2 është pasardhësi i smartfonit shumë popullor OnePlus Nord i vitit të kaluar.
Edhe pse ka një çmim ndjeshëm më të ulët sesa seritë e kushtueshme OnePlus 9, Nord 2 ka shumë funksionalitete që ofrojnë modelet premium.
Specifikat dhe funksionalitetet
OnePlus Nord 2 ka një kornizë prej polikarboni i cili qëndron në mes të paneleve Gorilla Glass 5 në ekran dhe kapakët e pasmë. Ekrani prej 6.43-inç FHD+ 90Hz AMOLED ka një skaner të shenjave të gishtërinjve nën ekran.
Në brendësi të smartfonit gjendet procesori flagship MediaTek Dimensity 1200 ndërtuar mbi arkitekturën 6-nanometër. Është hera e parë që OnePlus përdor një procesor jo nga Qualcomm.
Çipi Dimensity përfshin 8 bërthama ku 4 janë Cortex-A78 dhe 4 janë Cortex-A55 me frekuencë 2Ghz. Një procesor Cortex-A78 është i performancës së lartë me frekuencë 3Ghz ndërsa tre të tjerët e ngelur janë në frekuencën 2.6Ghz.
Bërthamat procesorike shoqërohen nga një grafikë Mali-G77 MP9 dhe modem Helio M70 të frekuencave 5G nën-6Ghz. OnePlus Nord 2 shitet në variantet 6GB dhe 8GB RAM me 128 dhe 256GB memorie UFS 2.1.
Smartfoni fuqizohet nga një bateri 4,500mAh me karikimin e shpejtë Warp Charging prej 65-vat. OnePlus Nord 2 karikohet nga 0-100% për 35 minuta.
Sistemi i kamerave të pasme përbëhet nga një sensor kryesor Sony IMX766 50-meapiksel f/1.8 me stabilizim optik, një sensor 8-megapiksel f/2.2 me kënd super të gjerë dhe një sensor monochrome 2-megapiksel.
Sensori 50-megapiksel është i njëjti i përdorur në OnePlus 9 Pro. Kamera selfie ka një sensor Sony IMX615 f/2.45 prej 32-megapiksel.
Funksionalitete ekstra janë Wi-Fi 6, Bluetooth 5.2, NFC, USB-C dhe dy karta SIM. OnePlus Nord 2 vjen me OxygenOS 11.3 bazuar në Android 11 dhe me premtimin e dy versioneve madhore Android dhe tre vite përditësime sigurie.
Çmimi dhe disponueshmëria
OnePlus Nord 2 do të shitet në variantet 6/8GB RAM dhe 128/256GB memorie dhe tre ngjyra Blu, Jeshile dhe Gri.
Versioni 6GB/128GB do të shitet vetëm në Indi. Ndërsa modeli 8/128GB kushton 399 euro dhe 12/256GB prej 499 euro. Smartfoni del në shitje në Evropë nga data 28 Korrik.
Copyright: © PCWorld Albania
